لسة في الكلية أو اتخرجت وعايش في فراغ؟

في البداية لازم نعرف إن الموضوع ده أولا وأخيرا هو تفكير بالعقل أكثر من القلب

وده برضه هتعرفوه من خلال متابعة الموضوع

الفراغ وخطوات المستقبل الجيد

الخطوات اللي المفروض يمشي عليها كل شاب واللي من المفضل تكون من أيام الكلية

عشان بعد كده تساعده في مستقبله

كتير من الشباب بيكون عايش في فترة الكلية أو من بداية تانية ثانوي لحد الكلية

في حالة من اللا وعي

يعني إيه؟؟

يعني عادي الأهل بيصرفوا عليه وهو مش شايل هم حاجة وعايش الدنيا بالطول وبالعرض

وفجأة بعد ما يتخرج يتصدم بالواقع المرير

أنا آعد على الرصيف ليه؟؟

ما فيه ناس زيي ومتخرجين معايا واشتغلوا

إشمعنى أنا؟؟

وممكن كمان الشباب ده مايفوقش بعد التخرج
ده ممكن يوصل لسن 28 و 30 ولسة للأسف ما فاقش

غير كده كمان في الكارثة

بعض الشباب مش بس عايشين في لا وعي

لا وكمان بيشربوا مخدرات (بيحششوا يعني وبانجو وكلام من ده)

يعني ولا بيشتغلوا ولا فارق معاهم

وبعضهم ييجي وقت معين تلاقيهم مزهولين (وقت مايلاقوا حب حقيقي صادفهم)

أنا عملت إيه في دنيتي؟؟

أنا ضيعت العمر ده كله من غير أي فايدة؟؟

يا ترى انا هقدر أتجوز ازاي دلوقتي؟؟

هقول لأهلها إيه وهتجوز منين وازاي؟؟

ولو الشاب مش فارق معاه حاجة طول حياته دي مأساه لوحدها
مش هنتكلم فيها دلوقتي

دلوقتي الموضوع ده للشباب اللي عنده استعداد يفوق

عنده استعداد يغير حياته عشان وقت مايحب يرتبط أو يتجوز

يلاقي نفسه واقف ثابت وواثق من نفسه

للشباب اللي عنده إرادة لكن مش عارف يوجهها ازاي

لسة ماعندوش إرادة أو ممكن نقول مافكرش في الموضوع غير قليل
وعايز حد ينصحه أو يوجهه

أهم حاجة يا جماعة الكورسات،
وماحدش ييجي يقولي لا انا الانجليزي بتاعي كويس مش محتاج كورس ولا بتاع
هقولك طيب تمام الانجليزي كويس ادخل أي مركز معتمد
وروح اختبر نفسك انت في المستوى الكام
وطلع منهم شهادة على الأقل بالمستوى اللي انت فيه لو مش عايز تزيد عنه
وده لأن انتوا عارفين بلد الشهادات ومش بس مصر،
حتى لو فكرت تسافر برة لازم يكون فيه إثبات على قدراتك،
إيه اللي هيثبت للي هتعمل معاه الإنترفيو انك فعلا كويس
هو مش هيضيع وقته في المقابلة عشان يعرف انت فعلا فاهم انجليزي وللا لا،
لازم يتأكد من شهادة تثبت ده وبعدها يبقى يعمل معاك المقابلة،
وطبعا ده بينطبق على ناس معينة مش كل الشركات بتعمل كده

طبعا غير كورسات اللغة كمان كورسات تدعم الدراسة اللي انت بتاخدها

لو انت مقتدر ماديا ممكن تاخد كورسات كويسة جدا تفيدك لو فرضنا انك في كلية تجارة

فيه كورسات جامدة جدا في الجامعة الأمريكية
مجرد ماتكون معاك أكيد هتشتغل في مكان كويس إن شاء الله

زي مثلا كورس الـ MAC
Modern Accounting

كلية هندسة ليها برضه كورسات خاصة بيها ودي ليها منح

كلية حاسبات ليها تدريب كل أجازة في شركات كبيرة وجميلة جدا

وغير الكليات دي فيه فرص كتير جدا في الكورسات

*********

ولو انت مش مقتدر ماديا فيه منح دراسية

زي منحة ITI لو تسمعوا عنها للخريجين التسع شهور وماتدفعش فيها ولا مليم

بس تمضي على إقرار بـ 15000 جنيه لو سيبتها في نصها وده لما تخلصها بيتقطع

ودي منحة في جميع تخصصات الكمبيوتر حسب ما تختار انت المجال اللي تحبه

منحة ICDL من وزارة الاتصالات ودي مش شرط تكونوا اتخرجتوا مدتها 3 شهور

وده لينك التقديم فيها

http://www.icdlegypt.gov.eg/

و فى كمان كنائس كتير بتعمل منح ICDL

أو ممكن تسأل في أي مركز كمبيوتر معروف في محافظتك وتسأل عندهم منحة الـ ICDL

بس يستحسن تشترك في الموقع وتختار الشركة اللي قريبة منك

هيجيبولك رقم تليفونها تتصل بيهم وتروح

ودي بتكون بمبلغ تأمين 120 جنيه تاخدهم لما تيجي تاخد الشهادة بتاعت الـ ICDL

وحاجات كتير لو حبيتوا اسألوا وانا احاول أجيبلكوا معلومات أكتر

حد ييجي يسألني مثلا

مانا أعد مرتاح في بيتنا إيه يجبرني أتعب نفسي في دراسة تانية؟؟

أرد عليك بقى بالجزء التاني من الموضوع

كل واحد من الشباب لازم يكون عنده عزيمة إنه يعمل حاجة في حياته

عشان مستقبله، عشان لما يفكر يرتبط أو يتجوز،

عشان ما يبقاش زي اللي أعدين من غير شغل ولا هدف في الحياة

كل واحد يحاول يعمل اللي عليه وإن شاء الله ربنا هيوفقه

برررررررررررررررررافو عليك يا جو

بجد انت اتكلمت فى موضوع مهم جد

وهو برضو مشكلة الشباب الايام دى

مرسى يا جو على الموضوع وعلى افكارك كمان

لحل المشكلة دى

ربنا يباركك

ميرسى يا سولين لمرورك

بالنيابة عن كل اعضاء المنتدى بشكرك فعلاً وانا وبقرأ موضوعك كان نفسي تكون قدامى واصقفلك لانك اتكلمت فى نقطة حساسة يمكن مش حاسس بيها اللى لسه ما أخرجت زى ما حضرتك أشرت لكن أنت بردوا نسيت تتكلم فى وضع حل لمن هو يريد أن يتعلم لغة انجليزية وليس مقيماً بالقاهرة مثلاً كالشخص المتغرب أكيد أنت فى مواقع أو سيديهات ممكن تساعد بيها الجميع ، عشان تبقي رسالتك وصلت للكل والحاضر يعلم الغايب .. والف شكر مرة تانى يا أخى الحبيب على محبتك لاعضائنا الموقرين والرب يبارك حياتك..

مكاريوس الكبير كتب:: كان نفسي تكون قدامى واصقفلك

لكن أنت بردوا نسيت تتكلم فى وضع حل لمن هو يريد أن يتعلم لغة انجليزية وليس مقيماً بالقاهرة مثلاً كالشخص

المتغرب أكيد فى مواقع أو سيديهات ممكن تساعد بيها الجميع ، ..

أولا شكرا لمرورك و لكلامك الجميل ده

ثانيا بالنسبه لحكاية اللى عايز يتعلم انجليزى طبعا المركز منتشره و السيدهات بارضو منتشره زى ما انت قلت

و فى كنائس كتييييييير بتعمل كورسات و فى مواقع على النت بتعمل كورسات أنجليزى OnLine زى مثلا

www.livemocha.com

و أى سؤال أنا متابع

» فراغ الوقت وعواطف الشباب